خیبرپختونخوا میں بلین ٹری سونامی پلس شروع کرنے کا فیصلہ کرلیا گیا، صوبہ بھرمیں 5 سالوں کے دوران مزید ایک ارب سے زائد درخت لگائے جائیں گے۔بلین ٹری سونامی، 10 بلین ٹری سونامی کے بعد اب بلین ٹری سونامی پلس کےلیے اقدامات شروع کردیئے گئے ، خیبر پختونخوا ایکو ٹورازم کا سکوپ بڑھانے پر بھی کام شروع کرنے کا فیصلہ کیا گیا ہے ، ضم شدہ اضلاع میں بھی مزید شجرکاری کےلیے ہنگامی بنیادوں پراقدامات شروع کردیئے گئے۔محکمہ جنگلات کے مطابق اس اقدام سے خیبرپختونخوا کو درپیش موسمیاتی تبدیلیوں کے خطرات میں بھی نمایاں کمی آسکے گی، نجی نرسریوں سے بھی پودوں کا حصول شجرکاری مہمات کا حصہ ہونگے۔ترجمان محکمہ جنگلات کے مطابق اس حوالے سے سرکاری نرسریوں میں پودے کاشت کرنےکے لئے فارسٹ ڈویژن کواحکامات جاری کردیئے گئے ہیں ، بلین ٹری سونامی پلس سےصوبے کے جنگلاتی رقبے میں اضافہ ہوگا۔ذرائع کے مطابق 10 بلین ٹری منصوبہ 19 ارب روپے میں مکمل کیا گیا تھا۔
