بھارتی فوج نے لائن آف کنٹرول پر بلا اشتعال فائنگ کر کے 2 شہری شہید جبکہ 1 کو شدید زخمی کر دیا۔پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا ہے کہ بھارت کی جانب سے آج 11 بجکر 55 منٹ پر لائن آف کنٹرول کے سیکٹر ستوال میں اندھا دھند فائرنگ کی گئی، بھارتی فورسز کی جانب سے چرواہوں کے ایک گروپ کو نشانہ بنایا، شہید ہونے والوں میں عبید قیوم اور محمد قاسم شامل ہیں۔آئی ایس پی آر نے اپنے بیان میں کہا ہے کہ معصوم کشمیریوں کے ساتھ معمول کا غیر انسانی رویہ اپنایا گیا، بھارتی فورسز کا جغرافیائی سیاسی محرکات، جھوٹے بیانیے اور من گھڑت الزامات کا نیا سلسلہ ہے، بھارت منصوبے کے تحت معصوم جانوں کے درپے ہے، پاکستان، بلااشتعال فائرنگ کے معاملے پر شدید سراپا احتجاج ہے، پاکستان لائن آف کنٹرول پر کشمیریوں کی جانوں کے تحفظ کو ملحوظ رکھے گا۔پاک فوج کے شعبہ تعلقات عامہ نے مزید کہا ہے کہ پاکستان اپنی مرضی کے انتخاب کے مطابق جواب دینے کا حق محفوظ رکھتا ہے، بھارت کو کشمیریوں کے بنیادی انسانی حقوق کے احترام کی یاد دہانی کرائی گئی ہے، کشمیریوں کی زمینوں پر کاشتکاری کا ناقابل تنسیخ حق بھی کشمیریوں کا ہے۔
