حکومت سے کوئی مذاکرات نہیں، احتجاج جاری رہے گا، بیرسٹر سیف

پشاور: ترجمان خیبرپختونخوا بیرسٹر محمد علی سیف نے کہا ہے کہ ہم مذاکرات پر یقین رکھتے ہیں اور ہم نے تحریک طالبان پاکستان (ٹی ٹی پی) سے بھی مذاکرات کیے ہیں تاہم فی الحال حکومت سے کوئی بات چیت نہیں ہو رہی۔شبلی فراز کے ہمراہ پشاور میں میڈیا سے گفتگو میں ان کا کہنا تھا کہ جعلی حکومت نے ہمارے خلاف جعلی مقدمات درج کیے، میرے خلاف 6 مقدمات درج کیے گئے، ہم نے احتجاج کیا ہے اور کرتے رہیں گے اور احتجاج ختم ہونے تک جاری رکھیں گے۔ انہوں نے کہا کہ اسلام آباد جانا ہر شہری کا حق ہے اور پی ٹی آئی کے بانی عمران خان نے واضح طور پر کہا ہے کہ احتجاج جاری ہے، دھرنے، جلوس، احتجاج، یہ سب ایک تحریک کا حصہ ہیں اور کہیں بھی احتجاج کرنا ہمارا حق ہے۔ بیرسٹر سیف نے کہا کہ میں ہمیشہ سے مذاکرات کا حامی رہا ہوں اور میں نے طالبان سے مذاکرات کی بھی بات کی ہے۔ ہم نے تحریک طالبان پاکستان (ٹی ٹی پی) کے ساتھ بھی مذاکرات کیے ہیں۔ ہم مذاکرات پر یقین رکھتے ہیں لیکن ابھی تک کوئی مذاکرات نہیں ہوئے۔ عمران خان اجازت دیں تو مذاکرات کریں گے۔